लागूऔषधसहित तीन जना पक्राउ

झापा । कोशीका तीन जिल्लाबाट लागूऔषधसहित तीन जना पक्राउ परेका छन् । झापा, सुनसरी र धनकुटाबाट उनीहरूलाई प्रहरीले पक्राउ गरेको हो । झापाको मेचीनगर नगरपालिका-६ बाट लागूऔषध नियन्त्रण ब्युरो काँकरभिट्टाबाट खटिएको प्रहरी टोलीले एक जनालाई पक्राउ गरेको छ ।

चेक जाँचको क्रममा झापा बुद्धशान्ति गाउँपालिका-४ का २१ वर्षीय पर्शुराम राईलाई २ ग्राम ३८० मिलिग्राम ब्राउन सुगरसहित पक्राउ गरेको हो ।

सुनसरीको बराहक्षेत्र नगरपालिका-२ मा इलाका प्रहरी कार्यालय चतराबाट खटिएको प्रहरी टोलीले भोजपुर हतुवागढी-३ का २२ वर्षीय निकश राईलाई पक्राउ गरेको छ । उनलाई १ किलो ४ सय ग्राम गाँजासहित प्रहरीले पक्राउ गरेको हो ।

यस्तै धनकुटाको सहिदभूमि-६ का २४ वर्षीय मिलन राईलाई १ किलोग्राम गाँजा र निषेधित औषधी ९ पिससहित इलाका प्रहरी कार्यालय छिन्ताङले पक्राउ गरेको छ ।

पक्राउ परेकाहरूको सम्बन्धमा सम्बन्धित प्रहरी कार्यालयबाट थप अनुसन्धान भइरहेको कोशी प्रदेश प्रहरी कार्यालय विराटनगरले जनाएको छ ।