सन्तोष सुवेदी/संगालोखबर 
धनकुटा । धनकुटाकी साहित्यकार झमक घिमिरेलाई नेपाली प्रगतिशील लेखक सङ्घ (प्रलेस) ले नगदसहित सम्मान गरेको छ । आज एक कार्यक्रमका बीच प्रलेस केन्द्रिय समितिले साहित्यकार घिमिरेलाई नगदसहित सम्मान गरेको हो । नेपाली प्रगतिशील बाङ्मयको उन्नयनमा योगदान पुर्याएको भन्दै साहित्यकार घिमिरेलाई सम्मान गरिएको प्रलेसले जनाएको छ ।
कार्यक्रमका प्रमुख अतिथि पूर्व सांसद तथा झमक घिमिरे प्रतिष्ठानका अध्यक्ष गोपाल गुरागाईं, धनकुटाका प्रमुख जिल्ला अधिकारी टुवराज पोख्रेल, धनकुटा नगरपालिका उपप्रमुख भिमादेवी खनाल, प्रलेस उपाध्यक्ष नमुना शर्मा लगायतले नगद २० हजार एक सय रुपैयाँसहित दोसल्ला र सम्मानपत्रले सम्मान गरेका थिए ।
Advertisement
घिमिरेले नेपाली साहित्यमा तथा प्रगतिशील बाङ्मयको उन्नयनमा विशिष्ट योगदान पुर्याएको भन्दै ‘प्रलेस प्रतिभा पुरस्कार २०८१’ प्रदा नगरिएको प्रलेस उपाध्यक्ष नमुना शर्माले बताइन् ।
वि.सं. २०३० साल असार २१ गते धनकुटाको कचिडेँमा जन्मिएकी घिमिरे प्रतिभावान् नेपाली साहित्यकार हुन् । उनको जन्मजात हातगोडा नचल्ने, उभिन, हिड्न नसक्ने र बोल्न नसक्ने उनी कान सुन्न र बुझ्न भने सक्छिन् । घिमिरेका दुईवटा खुट्टाको तिन वटा औँला चल्छन् । उनले तीनै औँलाको सहायतले लेख्छिन् ।
२०५३ सालदेखि लेखन सुरु गरेकी उनले राष्ट्रिय तथा स्थानीय पत्रपत्रिकाहरूमा स्तम्भहरू लेखेकी छन् । उनका सङ्कल्प, आफ्नै चिता अग्नि शिखातिर, मान्छे भित्रका योद्धाहरू, झमक घिमिरेका कविताहरू लगायतका कृति प्रकाशित छन् ।
यसैगरी अवसान पछिको आगमन लघु कथा पनि प्रकाशित छ । उनले कविता राम बाल साहित्य प्रतिभा पुरस्कार (२०५५), अस्वीकृत विचार साहित्य पुरस्कार (२०५६), लैनसिंह वाङ्देल पुरस्कार (२०७२), प्रबल गोरखा दक्षिण बाहु चौथोलगायत दर्जनौँ पुरस्कार एवं सम्मान प्राप्त गरेकी छन् ।
उनले लेखेको आत्मकथा ‘जीवन काँडा की फूल’ सर्वाधिक चर्चित कृति हो । यही कृतिका लागि उनलाई २०६७ सालको मदन पुरस्कार प्रदान गरिएको थियो ।
