धनकुटाबाट ६ वर्षमा रोजगारीका लागि ५४ हजार विदेशिए

धनकुटा । धनकुटाबाट एक वर्षको अवधिमा छ हजार बढी वैदेशिक रोजगारीमा गएका छन् । आप्रवासी स्रोत केन्द्रले अन्तराष्ट्रिय आप्रवासन दिवसको अवसरमा सरोकारवालाहरूसँग गरेको अन्तरक्रिया कार्यक्रममा विदेशिनेको तथ्याङ्क सार्वजनिक गरेको हो ।

आर्थिक वर्ष २०८०/०८१ मा छ हजार तीन सय ५८ जना बैदेशिक रोजगारीमा गएका छन् । जसमा पुरुष पाँच हजार पाँच सय नौ र महिला आठ सय ४९ जना रहेका छन् । केन्द्रको तथ्याङ्क अनुसार आर्थिक वर्ष २०७९/०८० मा वैदेशिक रोजगारीमा जानेको सङ्ख्या सात हजार सात सय ८४ थियो । जसमा पुरुष छ हजार नौ सय एक र महिला आठ सय ८३ रहेका थिए ।

अघिल्लो वर्षको तुलनामा २०८०/०८१ मा वैदेशिक रोजगारीमा जानेको सङ्ख्या केही कम रहेको आप्रवासी स्रोत केन्द्रकी सूचना अधिकृत मञ्जु राईले बताइन् । धनकुटा नगरपालिकाले जिल्ला प्रशासन कार्यालयमा आप्रवासन स्रोत केन्द्र स्थापना गरेको छ ।

जसले वैदेशिक रोजगारीमा जानेहरूका लागि सहजीकरण गर्दै आएको छ । त्यस्तै सेवा केन्द्रले वैदेशिक रोजगारीमा जाने तयारी गरिरहेकालाई रोजगार सम्बन्धी जानकारी दिनुका साथै समस्या परेकाहरूलाई सहजिकरण गर्ने गरेको छ ।

२०७५ साल पुषमा स्थापना भएको आप्रवासी स्रोत केन्द्रले छ वर्षमा ५४ हजार सात सय ६४ जना युवायुवती वैदेशिक रोजगारीमा गएको जनाएको छ । जसमा ४८ हजार चार सय ३७ पुरुष र छ हजार तीन सय २७ महिला रहेका छन् ।

धनकुटाका प्रमुख जिल्ला अधिकारी टुवराज पोख्रेलले जिल्लामा वैदेशिक रोजगारीमा जानेहरू ठगीमा परेको गुनासो धेरै आउने गरेको बताए । उनले यसका लागि स्वयम् व्यक्ति थप सचेत हुन आवश्यक रहेको बताए ।

जिल्लाका सातवटै पालिकामा सचेतना कार्यक्रम सञ्चालन गर्ने र प्रशासनमा आउने सेवाग्राहीहरूलाई पनि वैदेशिक रोजगारी सम्बन्धी जानकारी दिँदै सचेत गराउने गरेको उनको भनाइ छ ।

धनकुटा नगरपालिकाका प्रमुख चिन्तन तामाङले वैदेशिक रोजगारीबाट फर्किएर यही केही गर्छु भन्नेलाई कृषिमा अनुदानका कार्यक्रम ल्याइएको बताए ।