फिदिममा फाल्गुनन्द गोल्डकपको एघारौँ संस्करण हुँदै

पाँचथर । पाँचथरको फिदिममा फाल्गुनन्द गोल्डकपको एघारौँ संस्करण पुस ६ गतेबाट सुरु हुने भएको छ । प्रतियोगितामा ‘ए’ डिभिजनका चारसहित १० टिमको सहभागिता रहने आयोजक फिदिम स्पोर्टिङ क्लबले पत्रकार सम्मेलनमार्फत जानकारी दिएको छ ।

प्रतियोगितामा चर्च ब्वाइज, न्युरोड एनआरटी, मछिन्द्र क्लब र त्रिभुवन आर्मी क्लबले सहभागिता जनाउने छन् । यस्तै चित्लाङ क्लब काठमाडौं, विराट सिटी फुटबल क्लब विराटनगर, सहलेस युवा क्लब सिराहा, न्यु स्टार युवा क्लब सुनसरी, झापा फुटबल टिम र आयोजक फिल्म स्पोर्टिङ क्लब फिदिमले प्रतियोगितामा भाग लिनेछन् ।

विजेता टोलीले १० लाख ५५ हजार र उपविजेता टोलीले पाँच लाख ५५ हजार रुपैयाँ नगदसहित ट्रफी पाउनेछन् । प्रतियोगितामा सर्वोकृष्ट हुने खेलाडीले स्कुटर पाउने आयोजकले जनाएको छ । प्रतियोगिता पुस १५ गतेसम्म सञ्चालन हुनेछ ।