ताप्लेजुङमा ६ दिनदेखि बेपत्ता पुरुषको शव भेटियो

ताप्लेजुङ । ताप्लेजुङको सिरिजङ्गा गाउँपालिका-५ को काबेली खोलाले बगाउँदा बेपत्ता भएका पुरुषको शव फेला परेको छ । मंसिर १९ गते दिउँसो खोलाले बगाउँदा बेपत्ता भएका सोही स्थानका ४० वर्षीय राजेन्द्र बुढाथोकीको शव आज भेटिएको हो ।

सशस्त्र प्रहरी बल नम्बर १ बराहबाहिनी पकली सुनसरीबाट खटिएको सशस्त्र प्रहरीको टोलीले खोजतलासको क्रममा आज बिहान ११ बजे शव फेला पारेको प्रहरीले जनाएको छ ।

उनको शव बेपत्ता भएको स्थानबाट अन्दाजी ५० मिटर दक्षिण ढुङ्गाको चेपमा फेला परेको इलाका प्रहरी कार्यालय तेल्लोकका प्रहरी निरीक्षक दुर्गा खनालले जानकारी दिए ।
शवको कानुनी प्रकिया पुरा गरी पोस्टमार्टमका लागि पठाउने तयारी भइरहेको खनालले बताए ।