संगालोखबर 
विराटनगर । कोशी प्रदेशका विभिन्न स्थानमा भएका सवारी दुर्घटनामा चार जनाको मृत्यु भएको छ । हिजो झापा, सुनसरी र उदयपुरका छुट्टाछुट्टै स्थानमा भएका दुर्घटनामा चार जनाको मृत्यु भएको हो ।
झापा कन्काई नगरपालिका-८ लक्ष्मीपुर स्थित पूर्व पश्चिम लोकमार्गमा ना ४ च ४०८४ नम्बरको छोटा हात्ती गाडीले ठक्कर दिँदा एक जनाको मृत्यु भएको छ । गाडीले बाटो काट्दै गरेका सोही स्थानका ६५ वर्षीय गर्बसिंह राईलाई दिएको थियो । दुर्घटनामा गम्भीर घाइते भएका उनको बिर्तासिटी अस्पतालमा उपचारका क्रममा मृत्यु भएको हो ।
Advertisement
यसैगरी सुनसरीको इनरुवा नगरपालिका-६ स्थित पुर्व पश्चिम लोकमार्गमा नम्बर नखुलेको सवारीले ठक्कर दिँदा ९३ बर्षीय अमर बहादुर अधिकारीको मृत्यु भएको छ । गम्भीर घाइते उनको उपचारका लागि इनरुवा अस्पताल पुर्याउनसाथ मृत्यु भएको थियो ।
सुनसरीकै हरिनगर गाउँपालिका-४ स्थित भित्री सडक खण्डमा को १ ख ६४३१ नम्बरको टिपरले ठक्कर दिँदा एक जनाको मृत्यु भएको छ । टिपरको ठक्करबाट साइकलमा सवार देवानगन्ज गाउँपालिका-७ का ५० वर्षीय झलु उरावको घटनास्थलमै मृत्यु भएको हो ।
यस्तै उदयपुरको त्रियुगा नगरपालिका-१० बोक्सेमा बा प्र ०१-००६ ख ५८७१ नम्बरको हायस गाडीले ठक्कर दिँदा त्रियुगा-११ का ५५ वर्षीय परनसेर राईको मृत्यु भएको छ । उनको उपचारका क्रममा जिल्ला अस्पताल उदयपुरमा मृत्यु भएको हो ।
घटना सम्बन्धमा सम्बन्धित प्रहरी कार्यालयबाट आवश्यक अनुसन्धान तथा कानुनी कारबाही भइरहेको कोशी प्रदेश प्रहरी कार्यालय विराटनगरले जनाएको छ ।
