उदयपुरमा पाँच दलले उम्मेदवार टुङ्गो लगाए

उदयपुर । उदयपुरमा दुई वडाध्यक्ष पदका लागि उपनिर्वाचन हुँदैछ । त्रियुगा नगरपालिका-१२ र बेलका नगरपालिका-९ मा रिक्त वडाध्यक्ष पदका लागि हुन लागेको उपनिर्वाचनका लागि पाँच राजनीतिक दलले उम्मेदवार टुङ्गो लगाएका छन् ।

त्रियुगा नगरपालिका-१२ को वडाध्यक्षमा नेपाली काँग्रेसले सञ्जीव काफ्लेलाई उम्मेदवार बनाएको छ । नेपाल कम्युनिष्ट पार्टी (एमाले) ले लक्ष्मी नारायण चौधरी, नेपाल कम्युनिष्ट पार्टी (माओवादी केन्द्र)ले नविक वान्तावालाई उम्मेदवार बनाएको छ ।

यस्तै नेपाल कम्युनिष्ट पार्टी (एकीकृत समाजवादी)ले निर्मला चौधरी र राष्ट्रिय स्वतन्त्र पार्टीले ध्रुव पोखरेललाई उम्मेदवार बनाएको छ । बेलका नगरपालिका– ९ को वडाध्यक्षमा काँग्रेसले नवराज बस्नेतलाई उम्मेदवार बनाउँदा एमालेले मनोज खड्कालाई उम्मेदवार बनाएको छ ।

यस्तै माओवादी केन्द्रले भरत घिमिरे र राष्ट्रिय स्वतन्त्र पार्टी (रास्वपा) ले तेजमान विकलाई उम्मेदवार बनाएको छ । एकीकृत समाजवादीले उम्मेदवारको टुङ्गो लगाउन बाँकी छ ।

जिल्ला निर्वाचन कार्यालयका अनुसार त्रियुगा नगरपालिका-१२ मा तीन हजार आठ र बेलका नगरपालिका– ९ मा तीन हजार चार सय मतदाता रहेका छन् । रिक्त पदका लागि आगामी मङ्सिर १६ गते उपनिर्वाचन हुँदैछ ।