संगालोखबर 
सङ्खुवासभा । सङ्खुवासभाको चिचिला गाउँपालिका-३ का ३६ वर्षीय विकास राईको शव भीरमा भेटिएको छ । आपराधिक पृष्ठभूमिका उनको शव भीरमा भेटिएको प्रहरीले जनाएको छ ।
चिचिला गाउँपालिका-३ स्थित भीरबाट सडेको अवस्थामा उनको शव निकालिएको सङ्खुवासभा प्रहरीले जनाएको छ । हिजो साँझ भीरमा शव रहेको थाहा भएपनि आज बिहान मात्रै शव निकालिएको हो ।
Advertisement
घटनाको प्रकृति हेर्दा हत्या गरेर भीरबाट शव फ्याँकेको प्रष्ट हुने प्रहरीले जनाएको छ । सङ्खुवासभाका प्रहरी प्रमुख डीएसपी दक्षकुमार बस्नेतका अनुसार हत्या आरोपमा एक जनालाई पक्राउ गरिएको छ ।
उनको हत्या आरोपमा चिचिला-३ का प्रदीप राईलाई पक्राउ गरिएको हो । प्रदीपले नै घटनाको बारेमा प्रहरीलाई जानकारी गराएका थिए । विकास दुई महिना अघि मात्रै जेलबाट छुटेका थिए ।
स्थानीयले विकासबाट असुरक्षित महसुस गरेको भन्दै केही दिन अघि प्रहरीसमक्ष सुरक्षाको माग गरेका थिए । विकास विभिन्न मुद्दामा बारम्बार पक्राउ पर्दै सजाय भुक्तान गरेर छुट्दै आएका थिए ।
उनको शव पोष्टमार्टमका लागि जिल्ला अस्पतालमा राखिएको छ । विभिन्न कोणबाट घटनाका सम्बन्धमा अनुसन्धान भइरहेको बस्नेतले जानकारी दिए ।
