धनकुटामा बढ्यो दशैंको चहलपहल (फोटो फिचर)

धनकुटा । धनकुटामा दशैंको चहलपहल सुरु भएको छ । घटस्थापनादेखि नै गाउँघरबाट किनमेल गर्न आउने ग्राहकको भीड बढ्दै गएपछि व्यापारी उत्साहित भएका छन् । यस्तै गाउँघरबाट खसीबोका बेच्न आउने व्यापारीहरू पनि बढिरहेका छन् ।

गत वर्षको तुलनामा यसपटक धनकुटामा दशैंको चहलपहल बढेको स्थानीय विक्रम पौडेलले बताए । केहिदिन अघिको अविरल वर्षाले केही असहज परिस्थिति निम्त्याए पनि विस्तारै जनजीवन सामान्य बन्दै गएको उनको भनाइ छ ।

यसपटक प्राकृतिक बिपद्का कारण बजारमा चहलपहल केही ढिलो सुरु भएको व्यापारीहरू बताउँछन् । स्थानीय व्यवसायी रेवतीप्रसाद अधिकारीका अनुसार गत वर्षको तुलनामा यसपटक धनकुटामा व्यापार आशालाग्दो छ । दशैंको बेला अन्य समयको तुलनामा तेब्बर व्यापार बढ्ने उनले बताए ।

वर्ष दिनको समग्र व्यापार मध्ये दशैंमा मात्रै ४० प्रतिशतको हाराहारीमा कारोबार हुने व्यापारीहरू बताउँछन् । कोरोनाले ध्वस्त पारेको व्यापार व्यवसाय अहिलेसम्म पनि सोचेजस्तो फस्टाउन नसकेको व्यापारीको भनाइ छ ।