झापामा मोटरसाइकलको ठक्करबाट एक जनाको मृत्यु

झापा । झापामा मोटरसाइकलको ठक्करबाट एक जनाको मृत्यु भएको छ । मोटरसाइकलको ठक्करबाट बिर्तामोड-६ बुट्टाबारीका ६२ वर्षीय यामबहादुर लिम्बूको मृत्यु भएको हो ।

हिजो राति पूर्वपश्चिम राजमार्गअन्तर्गत बिर्तामोड नगरपालिका-६ कुमारी चोकमा प्रदेश १-०१-०१३ प २८०९ नम्बरको मोटरसाइकलले उनलाई ठक्कर दिएको थियो ।मोटरसाइकलको ठक्करबाट गम्भीर घाइते भएका लिम्बूको उपचारका क्रममा बीएण्डसी अस्पतालमा मृत्यु भएको प्रहरीले जनाएको छ ।

मोटरसाइकल चालक बुद्धशान्ति गाउँपालिका-४ का ३२ वर्षीय विकास लिम्बूलाई प्रहरीले नियन्त्रणमा लिएको छ । तीव्र गतिमा रहेको मोटरसाइकलका कारण दुर्घटना भएको प्रहरीको अनुमान छ ।