धनकुटामा खाना पकाउने ग्यास लिक हुँदा आगलागी

धनकुटा । धनकुटा नगरपालिका-७ चिरबिरे चौतारास्थित एउटा घरमा खाना पकाउने ग्यास लिक हुँदा आगलागी भएको छ ।

आज बिहान ११ बजेतिर रञ्जना रायाको चार तले पक्की घरको एउटा कोठामा खाना पकाउने क्रममा आगलागी भएको हो । आगलागीबाट कोठामा भएका सबै सामान जलेर नष्ट भएका छन् ।

आगलागीबाट मानवीय क्षति भने नभएको जिल्ला प्रहरी कार्यालय धनकुटाका प्रवक्ता डीएसपी राजबाबु महर्जनले जानकारी दिए । स्थानीयवासी र प्रहरीले करिब आधा घण्टापछि आगो नियन्त्रणमा लिएका थिए ।

लिक भएको ग्यास बन्द गरिएकाले ग्यास सिलिन्डर विस्फोट हुन नपाउँदा ठूलो क्षति हुनबाट जोगिएको आगो नियन्त्रणमा खटिएका स्थानीय सोवित श्रेष्ठले जानकारी दिए ।