संखुवासभामा बसको ढोकाबाट खस्दा एक जनाको मृत्यु

संखुवासभा । संखुवासभाको मादी नगरपालिका-९ फाविङमा बसको ढोकाबाट खस्दा एक जनाको मृत्यु भएको छ । ओखरबोटेबाट फाविङतर्फ जाँदै गरेको को.१ ख ५१४१ नम्बरको बसबाट खस्दा स्थानीय ३२ वर्षीय भक्तबहादुर तामाङको मृत्यु भएको हो ।

बसमा यात्रा गरिरहेका तामाङ ढोकाबाट खसेपछि सोही बसको पछाडिको चक्काले उनलाई किचेको थियो । गम्भीर घाइते भएका तामाङलाई उपचारका लागि मादी नगर अस्पताल लगिएको थियो । बिहीबार साँझ करिब ७ बजे दुर्घटनामा परेका तामाङको उपचारका क्रममा राती १० बजे मृत्यु भएको जिल्ला प्रहरी कार्यालय संखुवासभाले जनाएको छ ।

घटनापछि बस र चालक सुनसरीको धरान उपमहानगरपालिका–८ का ३८ वर्षीय सविन लिम्बूलाई इलाका प्रहरी कार्यालय चैनपुरले नियन्त्रणमा लिएको छ ।