अपाङ्गता भएकाहरूका लागि निःशुल्क स्वास्थ्य शिविर सञ्चालन गरिने

धनकुटा । धनकुटाको सहिदभूमि गाउँपालिकाले अपाङ्गता भएका व्यक्तिहरूका लागि निःशुल्क स्वास्थ्य शिविर सञ्चालन गर्ने भएको छ । भदौ २४ गते सहिदभूमि गाउँपालिका वडा नं.१ स्थित धाप स्वास्थ्य चौकीमा शिविर सञ्चालन गर्न लागिएको हो ।

अपाङ्गता भएका व्यक्तिहरूलाई गाउँमै सहज रुपमा स्वास्थ्य सेवा उपलब्ध गराउँने उद्देश्यले शिविर सञ्चालन गर्न लागिएको गाउँपालिका अध्यक्ष मनोज राईले जानकारी दिए । उनका अनुसार अपाङ्गता भएका व्यक्तिहरूलाई सोही शिविरबाट अपाङ्गता परिचयपत्र निर्माणमा पनि सहजिकरण गरिनेछ ।

गाउँपालिकाको तर्फबाट प्रमुख प्रशासकीय अधिकृत नविन कार्कीले आज सूचना जारी गरेर अपाङ्गता परिचय पत्रका लागि आवश्यक कागजातसमेत लिएर आउन आग्रह गरेका छन् ।

नागरिकताको प्रमाण पत्र र चार प्रति पासपोर्ट साइजको फोटो लिएर आउँन भनिएको छ । नागरिकता नबनाएको भए परिचय खुल्ने अन्य कागजात वा जन्मदर्ता, पहिले परिचयपत्र लिएको भए सो परिचयपत्र पनि लिएर आउँन आग्रह गरिएको छ ।