सन्तोष सुवेदी/संगालोखबर 
धनकुटा । धनकुटाको सिधुवामा सिधुवा छथर जोरपाटी सामुदायिक पुस्तकालय तथा स्रोत केन्द्र सञ्चालनमा आएको छ । शनिबार पुस्तकालय दिवसको अवसरमा उक्त केन्द्रको उद्घाटन गरियो ।
Advertisement
छथरजोरपाटी गाउँपालिका–६, सिधुवा बजारमा निर्माण भएको पुस्तकालय जापानी राजदूतावासका मिसन उपप्रमुख ताकाहिरो तामुरा र छथारजोरपाटी गाउँपालिका अध्यक्ष छत्रबहादुर सुब्बाले संयुक्त रुपमा उद्घाटन गरेका थिए ।
उक्त पुस्तकालय जापान सरकार र गाउँपालिकाको साझेदारीमा निर्माण गरिएको हो । जापान सरकारको तीन वर्षे आयोजना अन्तर्गत नेपालस्थित एसभिए र रिड नेपालको समन्वय तथा प्राविधिक सहयोगमा निर्माण गरिएको जनाइएको छ ।
जापान सरकारको एक करोड ६२ लाख, गाउँपालिकाको ५० लाख र स्थानीयवासीको ३० हजार गरी कुल दुई करोड १२ लाख ३० हजार रुपैयाँमा आयोजना सम्पन्न भएको हो ।
पुस्तकालयमा बच्चादेखि ज्येष्ठ नागरिकहरूले ज्ञान र जीवनोपयोगी सीप सिक्न सक्ने छथरजोरपाटी गाउँपालिका अध्यक्ष सुब्बाले बताए । हलसहित बनेको उक्त नौ कोठे भवनमा बालबालिका कक्ष, युवा अतिरिक्त, महिला, बहुप्राविधिक, आइसिटी, पुस्तकालय, र जोखिम न्यूनीकरण कक्ष साथै अपाङ्गमैत्री कक्षा समेत छ ।
पुस्तकालयमा तीन हजारभन्दा बढी पुस्तकहरू राखिएका छन् । आगामी दिनमा स्थानीय स्तरमा रहेका बौद्धिक, सांस्कृतिक तथा सामाजिक क्षेत्रमा रहेको विभिन्न विषयमा पुस्तकहरू प्रकाशन गर्दै जाने जनाइएको छ ।
पुस्तकालयलाई दीगो रुपमा निरन्तर सञ्चालनका लागि कृषि प्राविधिक तालिम, मेकानिकल तालिम, होमस्टे, तरकारी प्रशोधन र कम्प्युटर लगायतका विभिन्न जीवन उपयोगी तालिमहरू निःशुल्क दिइने केन्द्रले जनाएको छ ।
