भारी वर्षापछि भेलले बगाएर धरानमा बालकको मृत्यु

सुनसरी । भारी वर्षापछि आज साँझ भेलले बगाउँदा धरानमा एक बालकको मृत्यु भएको छ । धरान उपमहानगरपालिका–११ ऐश्वर्य मार्गको नालामा आएको भेलले बाढीले बगाएर १४ वर्षीय रोशन लिम्बूको मृत्यु भएको हो ।

स्थानीय भिक्टोरिया स्कुलमा कक्षा ९ मा अध्ययनरत उनलाई पढाइ सकेर घर फर्कँदै गर्दा नालाको भेलले बगाएको थियो । उनको शव धरान–१७ स्थित ठकुरी खोला पुलदेखि करिब सय मिटर उत्तरतर्फ फेला परेको प्रहरीले जनाएको छ ।

Advertisement

भारी वर्षापछि आएको भेल बाढीका कारण धेरैतिर क्षति पुगेको छ । केही स्थानमा सडक भासिएको छ । भेलले बगाएर सडकमा जताततै हिलो र ढुगा थुप्रिएको छ । चतरा लाइनका पसल र घरहरूमा भेल पसेर क्षति पुर्याएको छ ।