तेह्रथुम र सुनसरीमा भएका दुर्घटनामा दुई जनाको मृत्यु

सुनसरी । सुनसरी र तेह्रथुममा भएका सवारी दुर्घटनामा दुई जनाको मृत्यु भएको छ । तेह्रथुमको लालीगुराँस नगरपालिका–१ मा ग्यास बोकेको ट्रकको चक्काले किचिँदा गएराति सहचालकको मृत्यु भएको हो ।

को १ क १६८१ नम्बरको ट्रकले किचिएर सुनसरीको इटहरी घर भएका ४५ वर्षीय रमानन्द चौधरीको मृत्यु भएको प्रहरीले जनाएको छ । ट्रक चालक सुनसरीको रामधुरीका ४४ वर्षीय तेजबहादुर राईलाई प्रहरीले नियन्त्रणमा लिएको छ ।

यसैगरी, सुनसरीको बराहक्षेत्र नगरपालिका–५ लक्ष्मीपुरमा ट्रकको ठक्करबाट साइकलमा पछाडि सवार ८० वर्षीया लक्ष्मीदेवी चौधरीको मृत्यु भएको छ । साइकल चलाइरहेका उनका छोरा ४५ वर्षीय गुन्जा चौधरी घाइते भएका छन् ।

उनीहरु चढेको साइकललाई प्रदेश १–०२–००१ ख ९१०४ नम्बरको ट्रकले ठक्कर दिएको थियो । घाइते गुन्जाको उपचार भइरहेको प्रहरीले जनाएको छ । ट्रक चालक मोरङको कानेपोखरीका वीरबहादुर घिसिङलाई प्रहरीले पक्राउ गरेको छ ।