धनकुटा र तेह्रथुमलाई जोड्ने १७ किलोमिटर सडक सञ्चालनमा

धनकुटा । धनकुटा र तेह्रथुम जिल्लालाई जोड्ने १७ किलोमिटर सडक सञ्चालनमा आएको छ । कोशी प्रदेश सरकारद्वारा निर्माण गरिएको सडकको बुधबार मुख्यमन्त्री हिक्मतकुमार कार्कीले उद्‌घाटन गरेका छन् ।

धनकुटाको सिधुवादेखि तेह्रथुमको शुक्रबारेसम्मको डबल लेन सडक सञ्चालनमा आएसँगै ग्रामीण क्षेत्रका बासिन्दालाई लाभ मिल्ने सरकारको विश्वास छ । प्रदेश सरकार भौतिक पूर्वाधार विकास मन्त्रालय अन्तरगत पूर्वाधार विकास कार्यालय संखुवासभाले ८९ करोड ९० लाख रुपैयाँको लागतमा सडक निर्माण गरेको हो ।

यो सडकले स्थानीय बजार प्रवर्द्धन र विकासमा महत्त्वपूर्ण भूमिका खेल्ने मुख्यमन्त्री कार्कीले बताए । उनले पहाडी जिल्लामा भइरहेको बसाइसराइ रोक्न, कृषि र पर्यटनलाई प्रवर्द्धन गर्न यो सडक महत्त्वपूर्ण हुने दाबी समेत गरे ।