धनकुटा र तेह्रथुमका कृषकलाई २ करोडभन्दा बढी अनुदान

धनकुटा । भेटेरिनरी अस्पताल तथा पशुसेवा विज्ञ केन्द्र धनकुटाले कृषकलाई २ करोड रुपैयाँभन्दा बढीको अनुदान वितरण गरेको छ । धनकुटा र तेह्रथुमका कृषक तथा पशुपक्षी पालक कृषकहरूलाई अनुदान वितरण गरिएको हो । केन्द्रले आर्थिक वर्ष २०८०/८१ मा धनकुटा र तेह्रथुमका ९२ वटा पशुपालन सम्बन्धी व्यक्तिगत फार्म, समूह र सहकारीलाई २ करोड ३८ लाख ७० हजार २ सय रुपैयाँ अनुदान उपलब्ध गराइएको छ ।

विभिन्न ५ शीर्षकमा कृषकले कोशी प्रदेश सरकारको कार्यक्रम अन्तर्गत ७५ प्रतिशत अनुदान रकम पाएका हुन् । धनकुटाका ३६ र तेह्रथुमका १८ गरी जम्मा ५४ वटा कृषि संस्थाले दुध उत्पादनमा आधारित, धनकुटाका ३ र तेह्रथुमका ३ गरी ६ वटाले मागमा आधारित रहेका छन् । त्यस्तै, धनकुटाका र तेह्रथुमका १५/१५ गरी ३० वटा संस्थाले मोटरसहितको च्यापकटर, धनकुटामा एउटा मत्स्य नर्सरी निर्माण तथा व्यवस्थापन र तेह्रथुमको एउटा मत्स्य ह्याचरी निर्माण तथा व्यवस्थापनमा अनुदान उपलब्ध गराइएको भेटेरिनरी अस्पताल तथा पशुसेवा विज्ञ कार्यालय कार्यालयका प्रमुख हिमाकुमारी गौतमले जानकारी दिइन् ।

दुध उत्पादनमा आधारित अनुदान अन्तर्गत २ करोड १३ लाख ७९ हजार ८ सय, मागमा आधारित ६ लाख, मोटर सहितको च्यापकटर वितरणमा ८ लाख ९० हजार ४ सय, मत्स्य नर्सरी निर्माण तथा व्यवस्थापनमा ५ लाख र मत्स्य ह्याचरी निर्माण तथा व्यवस्थापनमा ५ लाख रुपैयाँ बराबरको अनुदान वितरण गरिएको थियो । स्थलगत भ्रमण गरेर अनुदान रकम प्रदान गरिएकाले अनुदानको उचित सदुपयोग भएको गौतमको भनाइ छ ।