खैरो हेरोइनसहित धनकुटा, सुनसरी र झापाका ६ जना पक्राउ

विराटनगर । धनकुटा, झापा र सुनसरीबाट लागूऔषध खैरो हेरोइनसहित प्रहरीले ६ जनालाई पक्राउ गरेको छ । पक्राउ परेकाहरूको साथबाट खैरो हेरोइन, नगद, मोबाइल, एटीएम कार्ड जस्ता वस्तु प्रहरीले बरामद गरेको छ ।

झापाको मेचीनगर नगरपालिका–६ बाट अवैध लागूऔषध खैरो हेरोइनसहित ४१ वर्षीय धनबहादुर लिम्बू पक्राउ परेका छन् । उनको साथबाट २ ग्राम १९० मिलिग्राम खैरो हेरोइन, मोबाइल २ थान, १० हजार रुपैयाँ र २ एटीएम कार्ड बरामद गरिएको प्रहरीले जनाएको छ ।

यसैगरी, जिल्ला प्रहरी कार्यालय धनकुटाबाट खटिएको टोलीले पाख्रीबास नगरपालिका–३ का २७ वर्षीय सरोज तामाङ र २३ वर्षीय पवन बस्नेतलाई पक्राउ गरेको छ । धनकुटा नगरपालिका–१ बाट पक्राउ परेका उनीहरूको साथबाट ९३५ मिलिग्राम खैरो हेरोइन बरामद भएको प्रहरीले जनाएको छ ।

यस्तै, सुनसरीको इनरूवा नगरपालिका–४ वीरेन्द्र टोलबाट खैरो हेरोइनसहित धनकुटाका युवक पक्राउ परेका छन् । प्रहरीका अनुसार धनकुटा नगरपालिका–६ का ३० वर्षीय प्रितम राई पक्राउ परेका हुन् ।

उनको साथबाट ७ ग्राम ४० मिलिग्राम खैरो हेरोइन, मोबाइल ४ थान, १ लाख ५ सय रुपैयाँ बरामद भएको छ । इनरूवा नगरपालिका–४ बस्ने अशोककुमार यादवको घरमा लागूऔषध कारोबार भइरहेको भन्ने सूचनाको आधारमा प्रहरीले छापा मारेर उनलाई पक्राउ गरेको हो ।

यसैगरी, इलाका प्रहरी कार्यालय कुमरखोद झापाबाट खटिएको टोलीले कमल गाउँपालिका–१ का २९ वर्षीय मौसम लिम्बू र ३६ वर्षीया शर्मिला राईलाई ५ ग्राम ५३० मिलिग्राम खैरो हेरोइनसहित पक्राउ गरेको प्रहरीले जनाएको छ ।