ओखलढुंगामा महिलाद्वारा विष खुवाएर दुई महिने छोराको हत्या

ओखलढुंगा । ओखलढुंगामा एकजना महिलाले आफ्ना दुई महिने छोराको विष खुवाएर हत्या गरेकी छन् । प्रहरीका अनुसार सिद्धिचरण नगरपालिका–४ चार्खुकी २६ वर्षीया दीपकुमारी राईले आफ्नै छोराको हत्या गरेकी हुन् ।

जिल्ला प्रहरी कार्यालय ओखलढुंगाका सूचना अधिकारी प्रहरी निरीक्षक विजय कार्कीका अनुसार ती महिलाले छोरालाई विष खुवाएर हत्या गरी जंगलमा लगेर फालेको स्वीकार गरेकी छन् । बालकलाई कीराबाट बाली जोगाउन खेतबारीमा प्रयोग गरिने ‘अलफाइटर’ नामक कीटनाशक विषादी खुवाएको अनुसन्धानबाट खुलेको प्रहरी निरीक्षक कार्कीले संगालोखबरलाई जानकारी दिए ।

बयानका क्रममा ती महिलाले बालक जन्मेदेखि रोइरहने, दिक्क लगाउने गरेकाले हत्या गरेको बताएको प्रहरी निरीक्षक कार्कीले जानकारी दिए । ती महिलाका बालकअघि जन्मिएका दुई छोरी छन् । उनका चार र ६ वर्षीय छोरी रहेको प्रहरीले जनाएको छ ।

गत असार ३१ गते जिल्लाको चिशंखुगढी गाउँपालिका–८ बाघखोरस्थित जङ्गलमा शिशु मृत अवस्थामा भेटिएका थिए । अनुसन्धानका क्रममा मृतक शिशु सिद्धिचरण नगरपालिका–४ चार्खुका युवराज राई र दीप कुमारीको छोरा हिमाल राई रहेको खुलेको प्रहरीले जनाएको छ । दिपकुमारीलाई प्रहरीले सोही दिन पक्राउ गरेको थियो ।