![](https://sangalokhabar.com/wp-content/uploads/2024/07/death-symbolic.jpg)
झापा । झापाको सीतापुरीमा मोटरसाइकल दुर्घटना हुँदा एकजनाको मृत्यु भएको छ । गएराति करिब १ बजे गौरादह–१ सीतापुरीस्थित पाडाजुँगी–गौरीगञ्ज सडकखण्डमा दुर्घटना भएको हो । चालकले मापसे (मादक पदार्थ सेवन) गरी मोटरसाइकल चलाएकाले अनियन्त्रित भइ दुर्घटना भएको प्रहरीले जनाएको छ ।
प्रहरीका अनुसार पाडाजुँगीबाट गौरादहतर्फ जाँदै गरेको लु ९ प १२७१ नम्बरको मोटरसाइकल अनियन्त्रित हुँदा पछाडि बस्ने भारतीय नागरिक ४१ वर्षीय कमल ठाकुरको मृत्यु भएको हो । टाउकोमा गहिरो चोट लागेका उनको दमकस्थित निम्स अस्पतालमा उपचारका क्रममा मृत्यु भएको थियो ।
मोटरसाइकल अनियन्त्रित भएर सडकको पूर्व दिशामा रहेको बिजुलीको पोलमा ठोक्किएको कोशी प्रदेश ट्राफिक प्रहरी कार्यालयले जनाएको छ । मोटरसाइकल चालक गौरादह–१ का ३३ वर्षीय गोपाल ठाकुरलाई इलाका प्रहरी कार्यालय दमकले नियन्त्रणमा लिएको छ । चालकले मादक पदार्थ सेवन गरेको पाइएको भन्दै प्रहरीले अनुसन्धान अघि बढाइएको जनाएको छ ।