तेह्रथुमको जिरिखिम्तीमा कालोझण्डा देखाएर मुख्यमन्त्री कार्कीविरुद्ध प्रदर्शन

तेह्रथुम । पहिचान पक्षधर संगठनका नेता–कार्यकर्ताले कोशी प्रदेशका मुख्यमन्त्री हिक्मतकुमार कार्कीलाई आज कालो झण्डा देखाएर विरोध गरेका छन् । तेह्रथुमको बसन्तपुरबाट म्याङलुङ जाने क्रममा बिहान जिरिखिम्तीमा कालो झण्डा देखाइएको हो ।

पहिचानको आधारमा प्रदेशको नाम राख्न माग गर्दै आन्दोलनरत पहिचान पक्षधरले २६ माघ २०८० मा सरकारसँगको सहमतिपछि आन्दोलनको स्वरुप परिवर्तन गरेको थियो । नेताहरूको यात्रामा अवरोध नगर्ने सहमति गरेको थियो । उक्त सहमतिविपरीत मुख्यमन्त्री तेह्रथुमको म्याङलुङ जाने क्रममा अवरोध भएको हो ।

पहिचान पक्षधरले पहिचानको आधारमा नाम राख्न माग गर्दै मुख्यमन्त्री कार्कीविरूद्ध प्रदर्शन गरेका थिए । जिल्ला प्रहरी कार्यालय तेह्रथुमका प्रमुख प्रहरी नायव उपरीक्षक रञ्जनकुमार दाहालका अनुसार १०–१२ जनाको समूहले मुख्यमन्त्रीलाई कालोझण्डा देखाउन खोजेको थियो । त्यहाँ परिचालित प्रहरीले रोकेको उनले बताए ।

२०७९ फागुन १७ गते कार्की नै मुख्यमन्त्री भएका बेला प्रदेशको नाम ‘कोशी’ राखिएको थियो । प्रदेशसभामा मतदान गर्दा ९३ सांसदमध्ये ८२ सांसदले कोशीको पक्षमा मतदान गरेका थिए । नामकरणका विरुद्ध पहिचान पक्षधरहरू त्यसयता आन्दोलित हुँदै आएका छन् । आन्दोलनका क्रममा एकजनाको मृत्यु पनि भइसकेको छ ।