भोजपुरको टेम्केमैयुङमा कालोपत्रे सडक भासियो

भोजपुर । केही दिनयताको अविरल वर्षाका कारण मध्यपहाडी लोकमार्गको टेम्केमैयुङ गाउँपालिका–३ मा पर्ने खण्डको सडक भासिएको छ । भोजपुर–चखेवा सडक खण्डको मेस्पाङ भन्ने स्थानमा आज बिहान करिब ६० मिटर सडक भासिएको हो ।

टेम्केमैयुङ गाउँपालिकाकी उपाध्यक्ष रमादेवी राईका अनुसार कालोपत्र गरिएको सडक भासिएको हो । सडक भासिएपछि यातायातका साधन सञ्चालन हुन नसकेको उपाध्यक्ष राईले संगालोखबरलाई जानकारी दिइन् ।

निरन्तर वर्षा भइरहेकाले उक्त सडकमा अझ बढी क्षति हुन सक्ने अवस्था देखिएको उनको भनाइ छ । पानी पर्ने क्रम जारी गरेकाले भासिएको सडक खण्डमा प्लास्टिक ओढाएर थप क्षति हुनबाट जोगाउने प्रयास भइरहेको गाउँपालिकाले जनाएको छ ।

भासिएको सडक खण्डमा तत्काल सवारी साधन सञ्चालन हुने अवस्था छैन । मर्मत गर्न समय लाग्ने भएकाले केही दिन लाग्न सक्ने जनाइएको छ ।