सन्तोष सुवेदी/संगालोखबर
Advertisement
धनकुटा । आर्थिक वर्ष २०८०/८१ मा जिल्ला अदालत धनकुटाले २५ प्रतिशत मुद्दा फर्छ्यौट गर्न बाँकी रहेको पाइएको छ । आज अदालतले सञ्चारकर्मीहरुसँग अन्तरक्रिया गर्दै चालु आर्थिक वर्षमा ७५ प्रतिशत मुद्दा फर्छ्यौट गरेको जनाएको छ ।
अदालतले कुल ६६६ मुद्दामध्ये ५०५ वटाको टुंगो लगाएको जनाएको छ । अदालतमा देवानी ४७४, सरकारवादी फौजदारी १३१ र दुनियाँवादी फौजदारी ५७ गरी ६६६ मुद्दा दर्ता भएका थिए । तीमध्ये गत वर्षको जिम्मेवारी सरेको १९९ मुद्दा रहेको अदालतले जनाएको छ । अदालतमा दर्ता भएकामध्ये देवानी ३७६, सरकारवादी फौजदारी ९१ र दुनियाँवादी फौजदारी ३४ मुद्दा फछ्र्यौट भएका छन् ।
यस्तै, दर्ता भएकामध्ये देवानी ९८, सरकारवादी फौजदारी ४० र दुनियाँवादी फौजदारी २३ वटा मुद्दा बाँकी छन् । अदातलमा १८ महिना नाघेको मुद्दा नभएको न्यायाधीश नारायणप्रसाद पराजुलीले जानकारी दिए ।
अदालतले आर्थिक वर्ष २०८०/८१ मा ७५ दशमलव ८३ प्रतिशत मुद्दा फर्छ्यौट गरेको जनाएको छ । गत वर्षको तुलनामा धनकुटा जिल्ला अदालतमा मुद्दाको संख्या बढेको न्यायाधीश पराजुलीको भनाइ छ ।
