विवाह गर्छु भन्दै जबरजस्ती करणी गरी फरार संखुवासभाका युवक पक्राउ

संखुवासभा । विवाह गर्ने प्रलोभन दिइ एक युवतीलाई जबर्जस्ती करणी गर्ने युवकलाई प्रहरीले पक्राउ गरेको छ । संखुवासभाको मकालु गाउँपालिका–५ का ३१ वर्षीय युवक भनिने लीलाबहादुर गुरुङ पक्राउ परेका हुन् ।

उनलाई सुनसरीको धरान उपमहानगरपालिका–१६ स्थित हंश मार्गबाट पक्राउ गरिएको हो । २०७९ चैतमा ती युवकले स्थानीय एक युवतीलाई विवाह गर्छु भन्दै प्रलोभनमा पारी जबर्जस्ती करणी गरेको प्रहरीको भनाइ छ ।

त्यसपछि उनी फरार भएका थिए । पीडित परिवारका तर्फबाट उजुरी परेपछि प्रहरीले उनको खोजी गरिरहेको थियो । निरन्तर निगरानी गर्ने क्रममा उनलाई जिल्ला प्रहरी कार्यालय संखुवासभा र इलाका प्रहरी कार्यालय धरानको टोलीले पक्राउ गरेको सूचना अधिकारी प्रहरी निरीक्षक कुमार लामिछानेले जानकारी दिए ।

पक्राउ परेका व्यक्तिउपर मुलुकी अपराध संहिता, २०७४ बमोजिम जबरजस्ती करणी मुद्दामा म्याद थप भई अनुसन्धान भइरहेको सूचना अधिकारी लामिछानेले बताए ।