सन्तोष सुवेदी/संगालोखबर 
धनकुटा । धनकुटा नगरपालिका यहाँ जारी सहिद रामकृष्ण श्रेष्ठ चौथो संस्करण महिला फुटबल प्रतियोगिताको उपाधिनजिक पुगेको छ । बुधबार भएको पहिलो सेमिफाइनल खेलमा छथरजोरपाटी गाउँपालिकालाई ० का विरुद्ध ३ गोलले हराउँदै धनकुटा उपाधिनजिक पुगेको हो ।
धनकुटाका लागि पहिलो हाफको १८ मिनेट र दोस्रो हाफको ३ मिनेटमा सन्जु तामाङले गोल गरिन् । २० मिनेटमा विपना राईले थप एक गोल गरी आफ्नो टिमलाई विजयी बनाउन सफल भइन् । खेलको म्यान अफ द म्याच बन्दै धनकुटाकी सन्जु तामाङले १ हजार ५ सय नगद पुरस्कार पाइन् ।
Advertisement
बुधबारै भएको दोस्रो सेमिफाइनल खेलमा कनकाई नगरपालिका विजयी हुँदै फाइनलमा पुगेको छ । मिक्लाजुङ गाउँपालिका मोरङलाई ० का विरुद्ध ५ गोलले पराजित गर्दै कनकाई उपाधिनजिक पुग्न सफल भएको हो ।
कनकाईका लागि पहिलो हाफको ६ मिनेटमा प्रतीक्षा चौधरी, ११ मिनेटमा जेनिफर रानामगर तथा दोस्रो हाफको ६ मिनेटमा एलेक्स चौधरी, १३ मिनेटमा जेनिफर राना मगर र २१ मिनेटमा मनिता ताम्राकारले गोल गरे । खेलको म्यान अफ द म्याच कनकाईकी प्रतीक्षा चौधरी बनिन् । उनले १ हजार ५ सय नगद पुरस्कार पाइन् ।
प्रतियोगिताअन्तर्गत बिहिवार धनकुटा नगरपालिका र कनकाई नगरपालिकाबीच उपाधिका लागि फाइनलमा प्रतिस्पर्धा हुनेछ । प्रतियोगिताको उपाधि विजेताले १ लाख रुपैयाँसहित ट्रफी तथा उपविजेताले ५० हजार रुपैयाँ पाउने आयोजकले जनाएको छ ।
