प्रेस युनियनद्वारा पत्रकार महासंघ धनकुटा शाखामा तालाबन्दी

धनकुटा । नेपाल प्रेस युनियन धनकुटाले नेपाल पत्रकार महासंघको शाखा कार्यालयमा ताला लगाएको छ । सदस्यता शुद्धीकरणको नाममा भेदभाव भएको भन्दै युनियनले बुधवार महासंघ अध्यक्षको कार्यकक्षमा तालाबन्दी गरेको हो ।

महासंघको विधानअनुसार जिल्ला शाखाले पत्रकारका जिल्लास्थित संघ, संगठनसँग भएको सहमतिमा सर्वसम्मत रुपमा केन्द्रमा नवीकरण र नयाँ सदस्यता सिफारिसका लागि पठाएको सूचीलाई बेवास्ता गरिएको युनियनको आरोप छ ।

केन्द्रले मनोगत रुपमा सदस्य संख्या थपघट गरी सार्वजनिक गरेकामा युनियनले गम्भीर ध्यानाकर्षण भएको जनाएको छ ।

युनियन शाखाका अध्यक्ष विनोद घिमिरेले विज्ञप्ति जारी गर्दै महासंघ शाखाबाट सिफारिस नै नगरिएका व्यक्तिहरुको नाम राखेर सदस्यता वितरणको तयारी गरिएको भन्दै असहमति जनाएका छन् ।