धनकुटाको महालक्ष्मीमा निःशुल्क स्वास्थ्य शिविर

धनकुटा । धनकुटाको महालक्ष्मी नगरपालिकाको आयोजनामा एक दिने निःशुल्क स्वास्थ्य शिविर सञ्चालन गरिएको छ । सोमबार नगरपालिकाले वडा नम्बर १ र ८ मा निःशुल्क स्वास्थ्य शिविर सञ्चालन गरेको हो ।

शिविरमा वडा नम्बर १ मा ७१ जना र वडा नम्बर ८ मा ८३ जना महिलाको स्वास्थ्य परीक्षण गरिएको थियो । स्वास्थ्य शिविरमा आङ खस्ने, पाठेघरको मुखको क्यान्सर स्क्रिनिङ गरिनुका साथै परिवार योजनाका साधन सेवालगायतका बारेमा समेत जानकारी गराइएको थियो ।

शिविरमा वडा नम्बर ८ मा ८ जना र वडा नम्बर १ मा १ जना महिलामा पाठेघरको मुखको क्यान्सरको लक्षण देखा परेको उप–प्रमुख मञ्जु कार्की अधिकारीले जानकारी दिइन् । यसैगरी, केही वडामा क्षयरोगसँग सम्बन्धित लक्षण देखिएकाले खकार परीक्षण समेत गरिरहेको उनले बताइन् ।

स्वास्थ्य शिविरका क्रममा लक्षण देखिएका व्यक्तिलाई पुनः विशेषज्ञ डाक्टरसहितको शिविर राखेर थप परीक्षण गरिने उनले जानकारी दिइन् ।