पूर्वशिक्षकको हत्या गर्ने युवक पक्राउ

कञ्चनपुर । कञ्चनपुरको बेलौरी नगरपालिका–६ विद्यानगरका सेवानिवृत्त शिक्षक ६३ वर्षीय लच्छी चन्दको हत्यामा संलग्न भएको आरोपमा प्रहरीले आज एकजनालाई पक्राउ गरेको छ ।

हत्यामा संलग्न रहेको आरोपमा ३५ वर्षीय महेश भण्डारीलाई पक्राउ गरिएको इलाका प्रहरी कार्यालय बेलौरीका प्रहरी निरीक्षक गौरीप्रसाद जैशीले बताए ।

बुधबार साँझ ८ बजे घरतर्फ जाँदै गरेका बेला चन्दलाई ढुङ्गा प्रहार गरी भण्डारीले गम्भीर घाइते बनाएका थिए ।

घाइते भएका चन्दलाई तत्कालै बेलौरी प्राथमिक स्वास्थ्य केन्द्रमा उपचारार्थ भर्ना गरिए पनि अवस्था गम्भीर हुँदा थप उपचारका लागि कैलालीको निसर्ग अस्पतालमा लगिएको थियो ।

उपचारका क्रममै चन्दको निधन भएको प्रहरीको भनाइ छ । प्रहरीले घटनाबारे थप अनुसन्धानको कार्य गरिरहेको जनाएको छ ।