हिन्दु समुदायमा आज अक्षय तृतीया पर्व मनाइँदै

विराटनगर । आज वैशाख शुक्ल तृतीया अर्थात् अक्षय तृतीया । हिन्दू समुदायमा जौँको सातु र सर्वत खाएर यो पर्व मनाइँदैछ । यस अवसरमा विष्णु र लक्ष्मीको पूजा गरी सातु र सर्वत दान गरेमा शुभ फल मिल्ने धार्मिक विश्वास छ ।

धर्मशास्त्रअनुसार वैशाख तृतीयाकै दिनदेखि त्रेता युगको सुरुवात भएको हो । यही दिन भगवान् परशुरामको जन्म भएको मानिन्छ । त्यसैले आजको दिनलाई परशुराम जयन्तीको रूपमा पनि मनाइन्छ ।

आजकै दिन शिव–पार्वतीको विवाह भएको पनि मानिन्छ । त्यसैले आज गरेको स्नान, दान र शुभ कर्मको विशेष महत्व छ । मधेसको प्राचीन मिथिला क्षेत्रमा पनि यो पर्व मनाइँदै छ । ब्राह्मणलाई जौँ, चनाको सातु र सक्खरको सर्वत दान गरेर मिथिलावासीले यी पदार्थ आफूले पनि सेवन गर्ने परम्परा छ ।

यस पर्वमा जति बढी भोका र तिर्खाएका व्यक्तिलाई सातु र सर्वत खुवाइन्छ, त्यति नै बढी पुण्य पाइने हिन्दू विश्वासले बाटोमा बसेर सातु र सर्वत बटुवालाई खुवाउने चलन छ ।