संगालोखबर 
विराटनगर । दोस्रो नेपाल ग्रासरुट छात्रा क्रिकेट महोत्सव विराटनगरमा सम्पन्न भएको छ । नेपाल क्रिकेट फाउण्डेसनको आयोजनामा मेरिलेबोन क्रिकेट क्लब फाउण्डेसन र क्रिकेट विथाउट बाउन्ड्रिजको सहकार्य तथा मोरङ जिल्ला क्रिकेट संघको सहयोग र कोशी प्रदेश क्रिकेट संघको प्रवर्द्धनमा ग्रासरुट क्रिकेट महोत्सव सम्पन्न भएको हो ।
महोत्सवको उद्देश्य कोशी र मधेश प्रदेशका विभिन्न हबबाट खेलाडीहरूलाई सहभागी गराई नेपालको ग्रासरुट स्तरको महिला क्रिकेटलाई प्रवर्द्धन गर्ने तथा खेलाडीबीच आपसी सिकाइको अवसर सृजना गर्नु रहेको नेपाल क्रिकेट फाउण्डेसनका अध्यक्ष अविशेक श्रेष्ठले बताए ।
कोशी प्रदेशका विराटनगर, सुनसरी, उदयपुर, पथरी र इलाम तथा मधेश प्रदेशका सिरहा र राजविराजका ७ वटा हबबाट ६३ जना बालिकाहरूको सक्रिय सहभागिता रहेको थियो ।
महोत्सवभर ८ ओभरको सफ्ट बल क्रिकेटका ११ वटा खेलहरू बिहानैदेखि दिउँसोसम्म सञ्चालन गरिएको थियो । हरेक हबले एकअर्कासँग खेल खेल्ने अवसर पाएका थिए ।
प्रतियोगितात्मक रूपमा पहिलो र दोस्रो स्थान निर्धारण गरिएको थिएन । यो महोत्सवको उद्देश्य क्रिकेटको उत्सव मनाउने र बालिकाहरूलाई खेलमा सहभागी गराउने रहेको अध्यक्ष श्रेष्ठले बताए ।
