विराटनगर किङ्ग्सको जर्सी र एन्थम सार्वजनिक

विराटनगर । विराटनगर किङ्ग्स्ले नेपाल प्रिमियर लिग (एनपिएल) को जर्सी सार्वजनिक गरेको छ । आज साँझ विराटनगरमा एक समारोहका बीच कोशी प्रदेशका मुख्यमन्त्री हिक्मत कुमार कार्की, मार्की खेलाडी सन्दिप लामिछाने, टिम मालिक पारस लुनिया लगायतको उपस्थितिमा जर्सी सार्वजनिक गरिएको हो ।

जर्सीको कलर पहेँलो र निलो रहेको छ । जर्सीसँगै कार्यक्रममा टिमको ऐन्थम गित समेत सार्वजनिक गरिएको छ । भ्वाइस अफ विराटनगर किङ्ग्स तथा एम्बासिडर समेत रहेका कुशल पोखरेलले उक्त रचना तयार पारेका हुन् ।

विराटनगर किङ्ग्सको गीत र्याप फम्र्याटमा रहेको छ । विराटनगर किङ्ग्सको फेसमा गायिका रचना रिमाललाई घोषणा गरिएको छ । पुर्बेली गायिका रिमाल क्रिकेटको ठुलो समर्थक हुन् ।

सोही अवसरमा नेपाली यू-१९ महिला क्रिकेट टिमलाई विश्वकप यात्रा दिलाउन सफल कोच महेश प्रसाद रिजाल र खेलाडी रिया शर्मालाई सम्मान गरिएको छ । कार्यक्रममा कोशी प्रदेशका ५ जिल्लामा रहेका क्रिकेट सङ्घहरूलाई क्रिकेट किट प्रदान गरिएको थियो ।