खोटाङको हुर्लुङ–जालपा सडकको पहिरो पन्छाइयो, यातायात सुचारु

खोटाङ । खोटाङको रावाबेँसी गाउँपालिका–६ हौंचुरको पोखरीमा खसेको पहिरो पन्छाइएपछि हुर्लुङ–जालपा सडक सुचारु भएको छ । केपिलासगढी र ऐसेलुखर्क गाउँपालिका पुग्ने हुर्लुङ–जालपा सडक अन्तरगत हौंचुर पोखरीमा खसेको पहिरो पन्छाइएपछि यातायात सुचारु भएको हो ।

हौंचुर पोखरीमा खसेको पहिरो तेस्रोपल्ट पन्छाइएको दिक्तेल रूपाकोट मझुवागढी नगरपालिका–१२ जालपाका वडाध्यक्ष दानबहादुर राईले जानकारी दिए ।

पहिरो पन्छाउँदा लागेको खर्च दिक्तेल रूपाकोट मझुवागढी नगरपालिका र केपिलासगढी गाउँपालिकाले संयुक्त रूपमा व्यहोर्ने भएका छन् । यो विषयमा दुई पालिकाबीच मौखिक सहमति भएको बताइएको छ ।