धनकुटा । धनकुटा बजारबाट खैरो हिरोइनसहित दुई जना पक्राउ परेका छन् । पक्राउ पर्नेमा धनकुटा–२ का १९ बर्षीय अनिल तामाङ र सोही स्थानका २२ बर्षीय सन्देश पिठाकोटे छन् ।
गएराती धनकुटा–६ बिचबजारमा हिडिरहेको अवस्थामा शंका लागेर चेकजाँच गर्ने क्रममा उनीहरुको साथबाट खैरो हिरोइन बरामद भएको जिल्ला प्रहरी कार्यालयका प्रवक्ता डीएसपी चिरञ्जिवी दाहालले जानकारी दिए ।
Advertisement
दाहालका अनुसार उनीहरुको साथबाट १ ग्राम ५०० मिलिग्राम ब्राउन सुगर बरामद भएको छ । प्लाष्टिकले वेरेर सानो–सानो छ वटा पोका बनाई लुकाएर बोकेको अवस्थामा ब्राउन सुगर भेटिएको हो ।
पक्राउ परेका दुवै जनाविरुद्ध बिहिबार जिल्ला अदालतमा मुद्दा दायर गरिएको छ । उनीहरु अहिले जिल्ला प्रहरी कार्यालयको हिरासतमा छन् । उनीहरुको कारोवारका विषयमा थप अनुसन्धान भइरहको प्रहरीले जनाएको छ ।
केही दिन अघि पनि हिले बजारबाट ब्राउन सुगरसहित एक युवा पक्राउ परेका थिए ।
