भक्तपुर । वर्षौंदेखि व्यापारीले कब्जा गर्दा रोकिएको भक्तपुरको सूर्यविनायकचोकदेखि जगातीको चकुखोलासम्मको सडक अतिक्रमण हटाएर सडक फराकिलो गर्ने कार्य सुरु भएको छ ।
डिभिजन सडक कार्यालय भक्तपुरले हरेक वर्ष उक्त सडकखण्ड फराकिलो पार्न सूचना जारी गर्दा पनि स्थानीयवासीको अवरोधका कारण रोकिएको विस्तार कार्य जनप्रतिनिधि आएपछि सुरु भएको हो । बिहीबार सूर्यविनायक नगरपालिका–८ का अध्यक्ष किरण थापाको नेतृत्वमा गएको सडक डिभिजन कार्यालय, स्थानीय बासिन्दा र प्रहरी सहितको टोलीले सडक विस्तार कार्य सुरु गरेको छ ।
Advertisement
अरनिको राजमार्गखण्डअन्तर्गत उक्त सडक ८२ फिट रहेको र सो मापदण्ड मिचेर व्यापारीले सडक कब्जा गरेर राखेको निर्माण सामग्री हटाउने र टहरा भत्काउने कार्य नगरेपछि स्थानीय जनप्रतिनिधि समेतको अग्रसरतामा त्यस्ता सामग्री एवम् टहरा हटाउन थालिएको हो ।
डिभिजन सडक कार्यालयले पटक पटक सडक कब्जा गरेर राखेको सामान हटाउन र टहरा भत्काउन सार्वजनिक सूचना जारी गर्दा पनि अटेर गरेपछि हटाउन थालिएको कार्यालयका इन्जिनियर सुदर्शन कार्कीले बताए ।
सूर्यविनायकदेखि जगाती सम्मका व्यापारीले सडकपेटी अतिक्रमण गरी राखिएका सामान हटाउन सो क्षेत्रका घरेबेटी र पसलवालाले तीन दिन समय माग गरेपछि शनिबार सम्मको समय दिइएको छ ।
इन्जिनियर कार्कीले भने, “शनिबारसम्म सडक कब्जा गरिराखेको सामग्री नहटाए आइतबार कार्यालयले सबै सामग्री उठाएर लैजान्छ, त्यसको नोक्सानको भागिदार व्यापारी आफैं हुनुपर्छ ।”
सडकमा व्यापारीले वर्षौंदेखि बालुवा, रोडा, ढुङ्गा, डन्डी लगायतका निर्माण सामग्री थुपारेर व्यापार गर्दै आएका थिए भने कतिपयले टहरा हालेर व्यापार गर्दै आएका थिए ।
सडक क्षेत्रको अतिक्रमणका कारण हरेक वर्ष वर्षा लागेपछि स्थानीय बासिन्दा र पैदलयात्रीलाई हिँड्डुल गर्न समस्या पर्ने, सडकमा पानी जमेर खोला जस्तै बन्ने गरेकाले यस वर्ष त्यो समस्या आउन नदिन अतिक्रमण हटाएर सडक फराकिलो पार्न लागेको वडाध्यक्ष थापाले बताए ।
निर्माण सामग्री र टहरा नभएका स्थानमा बिहीबारबाट सडक फराकिलो पार्न सुरु गरेको र अन्य क्षेत्रमा भने आइतबारबाट फराकिलो पार्ने उहाँले बताए ।
