वीरगञ्ज, १४ कात्तिक । जिल्ला प्रहरी कार्यालय पर्साले म्यादी प्रहरीमा भर्ना गराइदिने भन्दै रकम असुल्ने तीन जनालाई पक्राउ गरी सार्वजनिक गरेको छ ।
Advertisement
पक्राउ पर्नेमा बहुदरमाई नगरपालिका-१ का हरिनारायण राम, बिसुनदेव यादव र छठु महारा चमार रहेका छन् ।
जिल्ला प्रहरी कार्यालय पर्साले मंगलबार पत्रकार सम्मेलन गरी नगद ३७ हजार एक सय रुपैयाँसहित तीन जनालाई सार्वजनिक गरेको हो ।
उनीहरुको साथबाट म्यादी प्रहरीमा भर्ना हुन आएका २२ जनाको प्रवेशपत्र, २० जनाको प्रवेशपत्रको फोटोकपी, स्वास्थ्य परीक्षण रिपोर्ट पाँच थान र मोबाइल तीन थान समेत बरामद गरिएको जिल्ला प्रहरी कार्यालय पर्साका प्रवक्ता प्रहरी नायब उपरीक्षक प्रेमबहादुर शाहीले जानकारी दिए ।
म्यादी प्रहरीको भर्ना प्रक्रिया सुरु गरेसँगै म्यादी प्रहरीमा भर्ना गराइदिन्छु भन्दै उनीहरुले म्यादी प्रहरीका आवेदकसँग जनही तीन हजारदेखि पाँच हजारसम्म रकम उठाएको पर्साका प्रहरी उपरीक्षक डा गणेश रेग्मीले जानकारी दिए ।
जिल्ला प्रहरी कार्यालय पर्साले छनौट भएका म्यादी प्रहरीहरु कसैको सिफारिसमा नभएर आफ्नै क्षमताले सफल भएको दावी समेत गरेको छ ।
मंसिर २१ गते हुने प्रदेश तथा प्रतिनिधिसभा चुनावका लागि पर्सा प्रहरीले गत असोज २४ गतेदेखि ३० गतेसम्म आवेदन लिएको थियो ।
पर्सामा म्यादी प्रहरीका लागि १० हजार ४१ जनाले आवदेन दिएका थिए । त्यस मध्येबाट एक हजार ८१६ जना म्यादी प्रहरी भर्ना गरिने र २० प्रतिशतलाई वैकल्पिकमा छनौट गरिने पर्सा प्रहरीले जनाएको छ ।
