पहिरोले घर पुरिँदा तीन छोरासहित आमाको मृत्यु

बागलुङ । बागलुङमा पहिरोले घर पुरिँदा एकै परिवारका चार जनाको मृत्यु भएको छ । निशीखोला गाउँपालिका-३ धारखर्कमा पहिरोले घर पुरिँदा तीन छोरासहित आमाको मृत्यु भएको हो ।

पहिरोमा पुरिएर ३६ वर्षीया श्यामकुमारी बिक, उनका १३ वर्षीय छोरा मनोज बिक, ८ वर्षीय छोरा मुकेश बिक र ३ वर्षीय छोरा निशन विकको मृत्यु भएको प्रहरीले जनाएको छ ।

प्रहरीका अनुसार घरमा सुतिरहेको अवस्थामा पहिरो खसेपछि उनीहरूको मृत्यु भएको हो । पहिरोका कारण सो क्षेत्रमा विद्युत् सेवासमेत अवरुद्ध भएको प्रहरीले जनाएको छ ।