संगालोखबर 
विराटनगर । विराटनगरबाट चाेरीकाे सिटी सफारीसहित एक जना पक्राउ परेका छन् । मोरङको सुन्दरहरैँचा नगरपालिका-१० बाट चोरी भएको सिटी सफारी भारततर्फ लैजाँदै गरेको अवस्थामा उदयपुर घर भई हाल विराटनगर-४ बस्ने ३२ वर्षीय मणिकुमार तामाङलाई प्रहरीले पक्राउ गरेकाे हाे ।
प्रहरीका अनुसार शनिबार बिहानका राति नारायणप्रसाद थपलियाको घरकाे दराजमा राखिएको सुनचाँदीका गरगहना तथा घरअगाडि पार्किङमा राखिएको प्रदेश १-०२-००४ ह ८६३९ नम्बरको हरियो रंगको सिटी सफारी चोरी भएको थियो ।
घटनाकाे जानकारी पाएपछि खाेजी तीब्र पारेकाे प्रहरी टाेलीले विराटनगर-१६ दरैयामा सफारी फेला पारेकाे हाे। भारततर्फ लैजाँदै गरेको अवस्थामा चोरी भएको सफारी नियन्त्रणमा लिइएको मोरङ प्रहरीका सूचना अधिकारी मकेन्द्रकुमार मिश्रले जानकारी दिए ।
पक्राउ परेका तामाङको साथबाट सुनजस्तो देखिने पहेँलो धातुका गरगहना पनि बरामद गरिएको प्रहरीले जनाएको छ । घटनाका सम्बन्धमा प्रहरीले थप अनुसन्धान गरिरहेकाे छ ।
