संगालोखबर 
काठमाडौं । पाकिस्तानको काराकोरम हिमशृङ्खलामा अवस्थित ब्रोड पीक (८,०४७ मिटर) हिमाल आरोहणका क्रममा हिमपहिरोमा परी ६ जना नेपाली आरोहीहरू बेपत्ता भएका छन् ।
पर्यटन विभागले प्रेस विज्ञप्ति जारी गर्दै बेपत्ताहरूको शीघ्र खोज तथा उद्धारका लागि पाकिस्तान सरकारसँग निरन्तर समन्वय भइरहेको जानकारी दिएको छ ।
बिहीबार ब्रोड पीक आरोहणका क्रममा आएको भीषण हिमपहिरोमा परी विश्वविख्यात नेपाली आरोहीहरूसहित विभिन्न देशका पर्वतारोहीहरू बेपत्ता भएका हुन् ।
विभागले सार्वजनिक गरेको विवरण अनुसार बेपत्ता हुने नेपाली आरोहीहरूमा विश्वकीर्तिमानी पर्वतारोही निर्मल पुर्जा (निम्स दाई) सहित पुर बहादुर गुरुङ (युक्ता), किली पेम्बा शेर्पा (किलु), निमा शेर्पा, नावाङ थिन्डु शेर्पा र ग्यालु शेर्पा छन् ।
बेपत्ता भएका नेपाली आरोहीहरूको खोज तथा उद्धार कार्यलाई तीव्रता दिन पाकिस्तानस्थित नेपाली दूतावासमार्फत त्यहाँको सरकारसँग निरन्तर सम्पर्क र समन्वय भइरहेको विभागले जनाएको छ ।
