आज इस्लाम धर्मावलम्बीहरूको इद पर्व

विराटनगर । आज इस्लाम धर्मावलम्बीहरूले ईद उल फित्र अर्थात ईद पर्व मनाउँदै छन् । हिजरी पात्रो अनुसार रमजानको अन्त्यमा यो पर्व मनाइन्छ । इदलाई प्रार्थना, भेटघाट, नयाँ लुगा र मिठाई आदान-प्रदान गरेर उत्सवको रूपमा मनाउने चलन छ ।

यस पर्वमा आफूभन्दा सानालाई आशीर्वाद दिने गरिन्छ । आशीर्वाद लिन आउने आफन्तलाई सेवई र खजुरलगायत मीठा खानेकुरा खान दिने प्रचलन छ । खुशीपूर्वक दान गरेर दीनदुःखीलाई बाँडिने भएकाले यो पर्वलाई ईद उल फित्र भनिएको मुस्लिम समुदायको भनाइ छ ।

अरबी पात्रोअनुसार नवौँ महिनाको अन्तिम दिन चन्द्रमा देखिएपछि ईद उल फित्र मनाउने कार्यक्रम तय हुन्छ । रमजान महिनाभर सूर्याेदयदेखि सूर्यास्तसम्म पानीसम्म पनि नपिई बसिने व्रत सकाउँदै एक अर्कामा खुसियाली बाँडेर यो पर्व मनाउने गरिन्छ । ईदमा अल्लाहका नाममा विशेष नमाज पढ्ने परम्परा छ ।