ताप्लेजुङमा माघेनी मेला विशेष फुटबल प्रतियोगिता

ताप्लेजुङ । ताप्लेजुङमा माघेनी मेलाको अवसरमा फुटबल प्रतियोगिता सञ्चालन हुने भएको छ । आठराई त्रिवेणी गाउँपालिका-४ चाँगेमा आँपपानी युवा क्लबको आयोजनामा अन्तर क्लबस्तरीय प्रतियोगिता हुने भएको हो ।

आयोजकले सदरमुकाम फुङ्लिङमा पत्रकार सम्मेलन गर्दै पुस २५ गतेदेखि माघ १ गतेसम्म प्रतियोगिता सञ्चालन हुने जनाएको छ । प्रतियोगिता सञ्चालनको तयारी अन्तिम चरणमा पुगेको आयोजकको भनाइ छ ।

प्रतियोगिताको विजेता टोलीले एक लाख ११ हजार एक सय ११ तथा उप विजेताले ५५ हजार पाँच सय ११ रुपैयाँ नगदसहित ट्रफी, मेडल र प्रमाणपत्र पाउने क्लबका अध्यक्ष प्रेमबहादुर लिम्बूले जानकारी दिए । मेलामा राष्ट्रिय कलाकारहरूको प्रस्तुती समेत रहने छ ।