एनपीएल : विराटनगरको लगातार दोस्रो हार, सुदूरपश्चिमको सानदार सुरुआत

विराटनगर । नेपाल प्रिमियर लिग (एनपीएल) क्रिकेटमा विराटनगरको लगातार दोस्रो हार भएको छ । आज टीयू क्रिकेट मैदानमा सुदूरपश्चिम रोयल्ससँग विराटनगर पराजित भएको छ ।

सुदूरपश्चिमले विराटनगरलाई ९० रनले पराजित गरेको हो । सुदूरपश्चिमले दिएको १८३ रनको विशाल लक्ष्य पछ्याएको विराटनगर किंग्सले ९२ मात्रै बनाउन सक्यो ।

विराटनगरका बसिर अहमदले २४, निकोलस किर्टोनले १५ र क्रिस सोलेले १० रन बनाए । अन्य ब्याटरले दोहोरो अंकमा रन जोड्न सकेनन् । सुदूरपश्चिमका अविनाश बोहोरा र स्कटले तीन/तीन, ब्रान्डन, इशान पाण्डे र सैफ जैबले एक/एक विकेट लिए ।

सुदूरपश्चिमले ७ विकेटको क्षतिमा १८२ रन बनाएको हो । कप्तान दीपेन्द्रसिंह ऐरीले ५७, ब्रान्डनले ३६, बिनोद भण्डारीले २३, इशान पाण्डेले २१, सैफ जैबले १४, स्कटले १० रन बनाए ।

विराटनगरका अनिल खरेलले तीन, क्रिस सोले, इस्मत अलाम र बसिर अहमेदले एक/एक विकेट लिए । यसअघि उद्‌घाटन खेलमा विराटनगर जनकपुर बोल्ट्ससँग पराजित भएको थियो ।