एनपीएल उद्‌घाटन खेलमा आज विराटनगर किङ्स र जनकपुर वोल्ट्स भिड्दै

विराटनगर । नेपाल प्रिमियर लिग (एनपीएल) फ्रेन्चाइज क्रिकेट प्रतियोगिता आजबाट काठमाडौंमा सुरु हुँदैछ । किर्तिपुरस्थित त्रिभुवन विश्वविद्यालयको अन्तर्राष्ट्रिय क्रिकेट मैदानमा दिउँसो १२ः१५ बजे सुरु हुने प्रतियोगिताको उद्‌घाटन खेलमा आज विराटनगर किंग्स र जनकपुर बोल्ट्स भिड्दैछन् ।

नेपाल क्रिकेट सङ्घले आयोजना गरेको प्रतियोगितामा आठ फ्रेन्चाइज टिमले प्रतिस्पर्धा गर्दैछन् । विराटनगर किंग्सको कप्तानी लेगस्पीनर सन्दीप लामिछाने र जनकपुरको कप्तानी टप अर्डर ब्याटर अनिल शाहले गर्नेछन् । सन्दीप, विराटनगरका मार्की खेलाडी पनि हुन् । जनकपुरको मार्की खेलाडी आसिफ शेख भएपनि अनिललाई कप्तान बनाइएको हो ।

दुवै टिममा विदेशी खेलाडीहरू पनि छन् । विश्व चर्चित ब्याटर मार्टिन गप्टिलसहित ओमानका आकिब इल्यास, क्यानडाका निकोलस किर्टोन र स्कटल्याण्डका क्रिस सोल विराटनगर किंग्समा छन् ।

जनकपुरको टिममा न्युजलियाण्डकै अलराउण्डर जिम्मी निसमदेखि पाकिस्तानका मोहम्मद मोहसिन, अमेरिकन लाहिरु मिलान्था र जोसुअ ट्रोम्प, इंग्ल्याण्डका बेन माइक र क्यानडाका अलराउण्डर हर्श थाकेर छन् ।