विराटनगर किंग्सले ट्यालेन्ट हन्टबाट छान्यो तीन खेलाडी

विराटनगर । विराटनगर किंग्सले ट्यालेन्ट हन्टबाट तीन जना खेलाडी छनोट गरेको छ । कोशी प्रदेशका पाँच जिल्लामा भएको ट्यालेन्ट हन्टबाट छानिएका तीन खेलाडीको नाम आज सार्वजनिक गरिएको हो ।

‘ट्यालेन्ट हन्ट’ बाट फिर्दोश अन्सारी, कमल खत्री र सुजन थपलियालाई छानेको विराटनगर किंग्सले जनाएको छ । अब अन्तिम चरणको छनोट हुनेछ । जसमध्ये एक जनाले नेपाल प्रिमियर लिग (एनपिएल) मा प्रतिनिधित्व गर्न पाउनेछन् ।

विराटनगरको मुख्य प्रशिक्षकमा आयरल्याण्डका पूर्वक्रिकेटर केभिन ओ ब्राइन रहेका छन् । विराटनगरको मार्की खेलाडीमा राष्ट्रिय क्रिकेट टोलीका नियमित सदस्य सन्दीप लामिछाने छन् ।

नेपाल क्रिकेट सङ्घ (क्यान) को आयोजनामा ८ टोलीको सहभागितामा मंसिर १५ गतेदेखि पुस ६ गतेसम्म एनपीएल हुँदैछ । प्रतियोगितामा आठ फ्रेन्चाइज टोलीको सहभागिता रहनेछ ।

लिगमा विराटनगरसँगै, पोखरा एभेन्जर्स, जनकपुर बोल्ट्स, काठमाडौं गुर्खाज, चितवन राइनोज, सुदूरपश्चिम रोयल्स, कर्णाली याक्स र लुम्बिनी लयान्सले प्रतिस्पर्धा गर्नेछन् । विराटनगरले उद्घाटनकै दिन जनकपुर बोल्ट्ससँग पहिलो खेल खेल्नेछ ।

को-को छन् टोलीमा ?

सन्दीप लामिछाने, लोकेश बम, प्रतिस जीसी, बसिर अहमद, राजेश पुलामी मगर, जितेन्द्रकुमार मुखिया, अनिल खरेल, दीपक बोहोरा, सुभास भण्डारी, नरेन भट्ट, म्रिनाल गुरुङ, अकिब इल्यास, निकोलस कीर्तन, मार्टिन गप्टिल, क्रिस सोल र इस्मत आलम ।