१७ क्विन्टल गाँजासहित पक्राउ परे धनकुटाका यमजित राई

सप्तरी । सप्तरीको राजगढ गाउँपालिका-४ बेल्ही चपेना स्थित भित्री सडकखण्डबाट प्रहरीले १७ क्विन्टल गाँजा बरामद गरेको छ । हिजो राति पत्थरगाढाबाट झुटकीतर्फ गइरहेको टिपरलाई नियन्त्रणमा लिएर खानतलासी गर्दा गाँजा बरामद भएको हो ।

टिपर र चालक धनकुटाको सहिदभूमि गाउँपालिका-३ का ३३ वर्षीय यमजित राईलाई नियन्त्रणमा लिएको प्रहरीले जनाएको छ । गाँजा कहाँ लग्न लागिएको हो भन्ने खुल्न बाँकी रहेको छ ।

५६ वटा बोरामा प्याक गरेर टिपरमा राखेर माथिबाट बालुवा र गिट्टीले छोपिएको अवस्थामा गाँजा फेला परेको इलाका प्रहरी कार्यालय कल्याणपुरले जनाएको छ । घटनाका सम्बन्धमा थप अनुसन्धान भइरहेको प्रहरीको भनाइ छ ।