एनपिएलको खेल तालिका सार्वजनिक, उद्‌घाटन खेलमा जनकपुर र विराटनगर भिड्ने

विराटनगर । पहिलो संस्करणको नेपाल प्रिमियर लिग (एनपिएल) को खेल तालिका सार्वजनिक भएको छ । नेपाल क्रिकेट सङ्घ (क्यान) ले आज सार्वजनिक गरेको खेल तालिका अनुसार उद्‌घाटन खेलमा विराटनगर किङ्ग्स र जनकपुर बोल्ड्स भिड्ने भएका छन् ।

विराटनगर र जनकपुरको खेल मंसिर १५ गते १२ः१५ बजे त्रिवि क्रिकेट मैदानमा हुनेछ । मंसिर १६ गते स्थानीय तहको उपनिर्वाचन भएको कारण कुनै खेल हुनेछैनन् । १७ गते दुई खेल हुनेछन् । पहिलो खेल बिहान ९ः१५ बजे काठमाडौं गुर्खाज र चितवन राइनोजबीच हुनेछ ।

दोस्रो खेल दिउँसो १ः१५ बजे जनकपुर र कर्णाली याक्सबीच हुनेछ । लिग चरणका खेलहरू पुस १ गतेसम्म चल्नेछन् । लिगको शीर्ष दुईमा रहने टोलीले सिधै क्वालिफायर खेल्नेछ । तेस्रो र चौथो स्थानका टोलीले भने एलिमिनेटर खेल्ने छन् ।

यो खेल बिहान ९ः१५ मा हुनेछ । क्वालिफायरको खेल भने दिउँसो १ः१५ बजे हुनेछ । दुवै खेल पुस ३ गते हुनेछन् । क्वालिफायर १ मा पराजित भएको टोली र एलिमिनेटरको विजेताले दोस्रो क्वालिफायर खेल्नेछ ।

यो खेल भने पुस ४ गते दिउँसो १२ः१५ मा हुनेछ । यी दुईबीचको विजेताले क्वालिफायर १ को विजेतासँग पुस ६ गते खेल्ने फाइनल खेल्ने तालिका छ ।