विपद् घटनामा ज्यान गुमाएका व्यक्तिको परिवारलाई २ लाख

काठमाडौँ । मनसुनी विपद्मा परी ज्यान गुमाएका ६९ जनाका परिवारलाई मापदण्डअनुरुप दुई लाख रुपैयाँका दरले राहत दिइएको छ । यसका लागि जिल्ला विपद् व्यवस्थापन कोषमा निकासा रकम गरिएको छ ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार अहिलेसम्म मृत्यु भएका ६९ जनाका परिवारका लागि एक करोड ३८ लाख निकासा भएको हो । मनसुनको अवधिमा सबै प्रकृतिका विपदमा परेर अहिलेसम्म १२५ जनाभन्दा बढीको मृत्यु भइसकेको छ । त्यसमा सबैभन्दा बढी बाढीपहिरो र चट्याङका कारण मानवीय क्षति भएको छ ।

एक महिनामा भएको मनसुनी विपद्को अवस्था प्रतिवेदन सार्वजनिक गर्दै प्राधिकरणले जिल्ला तथा स्थानीय विपद् व्यवस्थापन समिति, नेपाल रेडक्रसलगायत संघ, संस्थाद्वारा प्रभावित परिवारलाई खाद्यान्न तथा गैरखाद्यान्न वस्तु वितरण गरिएको जानकारी दिएको छ ।

प्रतिवेदनअनुसार मनसुनबाट प्रभावित परिवारलाई तत्काल राहतस्वरुप १५ हजारदेखि २० हजारसम्म वितरण गरिएको जनाइएको छ । रेडक्रसबाट हालसम्म सात सय ४५ थान तारजाली, दुई सय ९५ थान ब्ल्याङ्केट, दुई सय पाँच थान म्याट्रेस, एक सय २५ थान भाँडाकुँडा, एक सय थान झुल, दुई सय २५ थान सरसफाइ किट, एक हजार एक सय ३८ मिटर कपडा उपलब्ध गराइएको छ ।