मदिरा पिएर हल्ला गरेपछि दुबई जान लागेका राजेशपायल राईलाई जहाजबाट ओरालियो

विराटनगर । दुबई जान लागेका गायक राजेशपायल राईलाई प्रहरीले जहाजबाट ओरालेर फर्काइदिएको छ । अत्यधिक मदिरा पिएर जहाजभित्र होहल्ला गरेको विमानका कर्मचारीले सूचना दिएपछि प्रहरीले उनलाई त्रिभुवन विमानस्थलमै रोकेको हो ।

बोर्डिङ पास भइसकेर जहाजमा समेत पुगिसकेका उनले होहल्ला गर्न थालेपछि प्रहरीले ओरालेको थियो । फ्लाई दुबईको जहाजमार्फत् दुबई जान लागेका राई विमानस्थलमा रोकिएका विमानस्थल सुरक्षा कार्यालयका डीआईजी रामदत्त जोशीले बताए ।

अत्यधिक मदिरा सेवन गरेका कारण राईलाई रोकिएको हो । मदिरा पिएर नशामा रहेको भन्दै प्रहरीले सामान्य अवस्थामा आएपछि दुबई जान दिइने प्रहरीको भनाइ छ ।