विराटनगर । प्रतिकूल मौसमका कारण सङ्खुवासभाको तुम्लिङटारमा हवाई सेवा अवरुद्ध भएको छ । बाक्लो तुँवालो लागेका कारण उडान हुन नसकेको हो ।
तुम्लिङटारमा काठमाडौंबाट बुद्ध एयरको दैनिक एउटा उडान हुने गरेको छ । काठमाडौंबाट बिहान ९ः२० बजे तथा तुम्लिङटारबाट काठमाडौंका लागि बिहान १०ः२० बजे उडान हुने गरेको बुद्ध एयरको तुम्लिङटार कार्यालयका निमित्त प्रमुख राजीव पोखरेलले बताए ।
Advertisement
आसपासका जङ्गल क्षेत्रमा डढेलो लागेकाले धुवाँ फैलिएको साथै विमानस्थल वरपर बाक्लो तुँवालो लागेकाले उडान हुन नसकेको जनाइएको छ ।
उडानका लागि ५ किलोमिटर वरपर क्षेत्रमा ‘भिजिविलिटी’ चाहिने तर हाल एक किलोमिटर क्षेत्रमा मात्र रहेको जनाइएको छ । तुम्लिङटारमा बुद्ध एयरको एटीआर–७२ जहाजले उडान भर्दै आएको छ ।
तुम्लिङटारबाट दैनिक ५५ जना यात्रु काठमाडौं जाने गरेका थिए । उडान हुन नसकेपछि कतिपय यात्रुहरु विराटनगर आएर काठमाडौं गइरहेका छन् ।
पोखरेलका अनुसार केही यात्रुहरुले भने पछिका लागि टिकट मिति सारेका छन् । कतिपय यात्रु सडक मार्गबाट गन्तव्य गइरहेको उनले संगालोखबरलाई जानकारी दिए ।
