खोटाङ । खोटाङको दिक्तेल रुपाकोट मझुवागढी नगरपालिकाले स्थानीय विषयको पाठ्यक्रम परिमार्जन गर्ने भएको छ । यसका लागि आवश्यक प्रक्रिया सुरु गरिएको नगरपालिकाले जनाएको छ ।
Advertisement
२०७८ सालमा लागू गरिएको स्थानीय विषयको पाठ्यक्रम अधुरो रहेको भन्दै त्यसलाई परिमार्जन गर्न लागिएको नगरपालिकाले जनाएको छ ।
नगरपालिकाको शिक्षा शाखाका नानीराम आचार्यका अनुसार संघीयताको अनुभूति दिने गरी जातजाति, भाषाभाषी, संस्कृतिलाई समेत समेटेर पाठ्यक्रम परिमार्जनको प्रक्रिया सुरु गरिएको हो ।
पहिलेको स्थानीय विषयको पाठ्यक्रममा समग्र नगरपालिकाको विषयमात्र समेटिएको उल्लेख गर्दै उनले अब जातजाति, भाषाभाषी, संस्कृति समेत पाठ्यक्रममा समेटिने जनाए ।
आचार्यका अनुसार परिमार्जन गरिने पाठ्यक्रममा हरेक वडामा छुट्टाछुट्टै विषय रहनेछन् । परिमार्जन प्रक्रियाका लागि वैशाख १४ र १५ गते सहजकर्ताहरूलाई तालिम दिइएको नगरपालिकाले जनाएको छ ।
स्थानीय पाठ्यक्रमबारे सुझबुझ भएका र सक्षम विद्यालय व्यवस्थापन समिति अध्यक्ष, मावि तथा आधारभूत तहका प्रधानाध्यापक तथा शिक्षकलाई सहजकर्ताको तालिम दिइएको हो ।
